Overblog Suivre ce blog
Editer l'article Administration Créer mon blog
Tadukli, le Kabyle Magazine

Magazine artistique, politique et culturel de la Kabylie. Cet espace prône le dialogue entre les peuples et les cultures. Il est ouvert aux autres cultures du monde.

Lɛerbi Yeḥyun: Zik ttaruɣ akken ad d-iniɣ, ass-a ttaruɣ akken ad iliɣ

Publié le 5 Juin 2017 par Timunent Taqvaylit in Interviews

D ameɣnas, d amyaru, d aselmad n teqbaylit, Larbi Yahioun d mmi-s n Tefrit, taddart n Massin Uharun. Seg wasmi d-yekker d netta yezzuzen-it umennuɣ ɣef tnaslit, tilelli d yizerfan n wemdan. Yebda almad n tira n tmaziɣt deg uɣerbaz alemmas akked tesnawit deg yiseggasen imezwura n 2000.  Di tesdawit n Bgayet yewwi-d agerdas di tsekla d tutlayt taqbaylit.

Yerra-d ɣef tuttriwin-nneɣ, ur ssugguteɣ ara awal fell-awen, ad ken-ǧǧeɣ ad as-teslem!

-Tzemreḍ ad aɣ-d-tiniḍ deg kra n wawalen anwa i d Larbi Yahioun i wid d tid urɛad ur k-yessinen?

Nekk Mass Lɛerbi Yeḥyun d yiwen gar yiselmaden n Teqbaylit i irefden amennuɣ γef yidles d tnekkit s tektiwin d tira, acku tutlayt ur nettwaru ara, leqrar-is d nnger.

-Seg wasmi i d-yeffeɣ wedlis-ik Taqbaylit, d kečč tettidireḍ leḥris n udabu azzayri, ayɣer ɛni?

Tamezwarut d azwel n udlis “Taqbaylit, iles d yidles”, ahat ur asen-yeɛǧib ara imi yettmeslay-d ɣef tutlayt, tasekla d yidles n Teqbaylit. D ayen ara yessakwin Iqbayliyen akken ad zuxen s yidles-nsen u ad nnaɣen fell-as. Tis snat, imi nekk d ameγnas n Mak-Anavad, ayen akk ara d-iniɣ neɣ ara yaruɣ ur yettwaqbal ara. Daymi adabu n Lezzayer yegdel akk isaragen-iw d uznuzu n udlis-a. d acu kan, xas yettwagdel, adlis-iw yuweḍ ɣer yifassen n yimeɣriyen i t-id-yessutren d yimeɣnasen i t-yuɣen s tuget. Tajmilt-nsen d tameqqrant.

-D acu iɣef i d-yettmeslay udlis-a?

Adlis d tazrawt tamatut ɣef wayen i d-yeskanen dakken nekkni d aγref. Aḥric amezwaru, yuwi-d γef tutlayt d tsekla taqbaylit d umecwar i d-lḥant seg timawit ɣer tira. Ladγa tiwsatin timaynutin i d-ibanen deg tsekla-nneɣ “ungal d tullist”. Aḥric wis sin, yuwi-d γef umezruy d tmetti taqbaylit. Deg uḥric-a uγaleɣ-d skefleɣ-d amezruy n tgelda n Kuku, syin zziγ-d awal γef tuddsa tanmettit n Leqbayel gar zik d tura, azalen inmettiyen d wayen i ibeddlen ass-a. aḥric wis krad, giɣ-t d tajmilt i kra n wudmawen n yidles i d-yefkan aṭas i teqbaylit ama s wawal ama s tira neɣ s ccna. Udmawen yecban dda Lmulud at Mɛemmer, Muḥya, Ṭawes Ɛemruc, Meɛṭub d Ferḥat …

-Tebdiḍ amennuɣ mezziyeḍ, di tazwara ɣef tmaziɣt, syin akkin ɣef timanit, tura ɣef timunent, amek i tzemreḍ ad aɣ-d-tesfehmeḍ amecwar-a?

Di tazwara nennuɣ ɣef Tmaziɣt am wakken i nnuɣen fell-as yimezwura, imi neḥsa dakken tamurt-a d tamaziɣt, neḍmeɛ ad teɛqel aẓar-is, ad tuɣal s imawlan-is, maca seg tedyanin n tefsut taberkant 2001, mi walaɣ atmaten-iw ɣellin seddaw n rrsas n udabu azzayri, imir-nni umneɣ dakken ur d-yeqqim wayen ara aɣ-yezdin d Lezzayer tamesbaṭlit, imi d asif n yidammen i yekkan gar-aneɣ. Dγa kecmeɣ deg umussu n timanit. Ɛeddan iseggasen, tikti n timanit tuɣ aẓar deg tmetti taqbaylit, maca nufa-d  dakken ur nezmir ara ad nawi timunent daxel n ddula tamesbaṭlit i irekḍen idles-nneɣ d umezruy-nneɣ. Am win ara ak-yefken tilelli daxel n lḥebs! Imi ulamek ara nesbedd timanit taqbaylit daxel n Lezzayer taɛrabt tineslemt.

Ass-a umneɣ dakken ala timunent i d-yeqqimen d tifrat ma nebγa ad nili d aγref. Skud nesɛa akal i nezdeɣ, tutlayt nessawal yis-s, idles nettidir deg-s, nesɛa amezruy d tγerma i d-yeǧǧan isem-is deg umezruy n talsa, ihi nuklal ad nesɛu awanek iman-nneɣ akken ad nesɛu amkan-nneɣ deg umaḍal. ad nili d nekkni, d Iqbayliyen, mačči d wiyaḍ.

-D acu i ilaqen ad t-xedmen Yiqbayliyen iwakken ad fken afus i watmaten-nneɣ Irifiyen yettidiren taswiɛt tasihrant qessiḥen?

Aγref Aqbayli d win yettnaγen γef tlelli d yizerfan n umdan n yal aγref yettwaḥeggfen, ama deg wakal n Tmazγa neγ di ddunit s umata. Akken i nettnaɣ nekkni γef timunent-nneγ ara nennaγ diγen γef timunnet n yal aγref. Ula d Irifiyen aql-aɣ s idis-nsen, maca ilaq kan ad ibin wayen iγef ttnaγen akken ad nwali amek ara d-yili yibeddi-nneɣ γer tama-nsen. Yerna ass-a yezwar umennuɣ ɣef Teqbaylit d tmurt n Yiqbayliyen imi mazal ur nuwiḍ ara ɣer yiswi-nneγ. Mi nesbedd awanek-nneɣ nezmer ad nefk tayet i yal aɣref i yuḥwaǧen tallelt-nneɣ.

-Amussu n Timunent n tmurt n Yiqbayliyen (MAK) yuɣal ass-a d amussu asertan i d-yufraren deg tmurt n Yiqbayliyen, d asurif meqqren deg umennuɣ ɣef timunent neɣ xaṭi?

Ih, d tidet. Ass-a nebɣa-t neɣ nugi-t, maca annar isebgen-d dakken tazmert tasertant i d-yufraren deg Tmurt n Yiqbayliyen d amussu MAK-ANAVAD. Yezga deg unnar ama s yinejmuɛen ama s tikliwin. Ass-a tikti-a temɣi deg wallaɣ n waṭas n Yiqbayliyen, imi ur teqqim ara kan d tikti, maca tuɣal d asenfar, d asenfar ara yebnun tamurt-nneɣ, ad as-d-yerr iseɣ i as-yettwakksen acḥal aya. Ma d wid i yugin asenfar-a yerna ur d-fkin ara asenfar nniḍen, ad d-iniɣ kan mazal ur gzin ara timsala akken i iwata, imi ula d timental-nsen bnant ɣef yiḥulfan, ihi ad asen-iniɣ, sḥasfeɣ, iḥulfan urǧin bnan tamurt neɣ sbedden awanek !

-Yella kra n udlis amaynut i tettaruḍ?

Nekk d tira d tamacahut ur nettfakka. Xas ulamma di tazwara ttaruɣ kan akken ad d-iniɣ ayen bɣiɣ d wayen ttxemmimeɣ, maca ass-a ttaruɣ akken ad iliɣ. Ttaruɣ s teqbaylit, tutlayt-iw n tyemmat xas ḥsiɣ s wuguren ara yi-d-yemmagren, ladɣa imi ulac aṭas n yimeɣriyen, maca mazal ttaruɣ. Akka tura ssewjadeɣ amud n tullisin i wumi fiɣ azwel “Tudert nniḍen”, d yiwen n udlisfus ɣef tesnimant d tneflit tudmawant. D adlis amezwaru γef “la psychologie positive” s teqbaylit, akken ad ḥsun madden diɣen dakken tutlayt-nneɣ d tutlayt n tussna mačči kan n tsekla. Asiẓreg-nsen ahat ad d-yili ɣer taggara n useggas-a 2017.

-D acu ara aɣ-d-tiniḍ ɣer taggara n tdiwennit-a?

Ad ak-d-iniɣ tanemmirt tameqqrant i kečč γef tdiwwenit-a. S tumert d yiseɣ si d-rriɣ i yiseqsiyen-ik ladγa i kečč yellan d aselmad-iw n Tmaziɣt deg uɣerbaz alemmas Internat deg Uqbu. ass-a tesseqsaḍ yiwen seg yixalafen i tleqmeḍ akken ad yeddu di lǧerra n tmussni-k d  timmeɣnest-ik. Tanemmirt.

-Tanemmirt a Larbi.

Tadiwennit i d-yesker Karim Kherbouche

Commenter cet article

Tannina 06/06/2017 18:15

Tanemmirt a Larbi tres bonne interview, jai adoré bravo pour ton travail.